{ خدابیل بمدرسه میرود } قسمت سی و دو _32

ملا زمون گرم تعریف بی که یه شلوئی ( شلوغی ) وست منه حوش .. وو یکی بُلند بُلند نا سزا ایگوو .. یه هم همه ای وست منه میلس .. ایخواستن بوینن چه خوره وو یوو کینه که ایطور داره داروو دشمون اِیکنه .. نیشتن دیدن قوریته که تش منه سرس بی وو زمین وو اسمون دوُهده بی به یَک ..

ملا که ز جریانس خوور داشت گوو دونگ آس نیدن بهلینس بیا داغل بنشینه طی خوم .. قوریته اوردن نشوندن طی ملا .. ز قیافس معلوم بی که منی تش منه سرس بی .. لوواس دک ایخردنن وو رنگس اووی بی جور گچ سفید وو لاشس اووی بی به دگاهش .. ملا با متانت ، که نشون ز بزرگی وو اصلالت وو تجروبه داشت ، ایدونست که ایر میون داری نکنه ، احتمال ایدا که جنگ سختی در بگره .. چینا که قوریت سی دل همیوو اُووی که هر طور اویده ایکاره بهم بزنه ، وو نهله که ایکار سر بگره .. ملا دست قورته گره زورس دا وو یه تکون دا ، بس گوو : اینشینی همچوو کِل خُم .. دونگ نیدی تا بت بگوم .. بینیم خدا چه خوو .. حضرات هم که پای بسون بر خرده بی ، ولی به احترام ملا که سِند وو سالی زس گودشته بی ، هیشکی هیچی نگوو .. ملا زمون ری کرد بسون وو گوو : مو با ای ریش اسپیدوم ز ایسا معذرت ایخوم ، وو زتون خواهشت ایکنوم یه دم بُم گوش بگرین بی نین گومتون چه !! .. ای جغله وو دوهدر ناف بُر یَکِن وو ز کوچیری نشونسون کردن سی یک .. اما بوویلسون سی دل شروُمی گروُمی با یک سرسون بازستن .. یوو هم جغله ایه .. جاهله غرور ورداشتس .. پی حرف بویل نیروون .. بوو دوهدرم صلا سه داره ، میلس نی دُهدرسه بس بده .. زحمتسه کشیده ، اختیارسه داره ، البت کسی نتره اجبارس کنه دهدرسه بزور زس بستونه .. بُوو فرجلا خوسه جا بجا کرد گوو : ایما جنابعالینه بعنوان گفتر خمون قوول داریم فرمایشت سرکاره انیم ری تیامون .. ایر ای جغله کُر آغاسه ؛ نُوکرتم کُر هالوسه .. دوهدر جا غریوی نیروُوه .. بُوو دا دُهدرم راضین به ایکار .. همیطور که فرمایشت کردی ، صلاه اختیار دار دُهدرسونن .. اینون ایر ایخواستن ایکار سر بگره !! اول واسکه دل دا بُوو دُهدره بدست بیارن .. تا دلسون بِ رضا بووه به ایکار .. نه کار خراووی بکنن .. بعدم اَنتظار داشته بوون دُهدر بسون بدن .. پَ کونونی بُوو جغله ؟؟ حکمن رهده پاریونه خیش کنه !! با گودن ای متلک ، مال پوئین پای نهادن وا حنده .. قوریتم اوی گروُ جُم کنه سیس .. ملا زمونم مچ دستسه گره واداشتس بزمین .. گوو بنشی بگِل جغله .. نیشتوم دیدوم حرص پر تیاس بی .. تش گرهدوم سیس که دیدوم داره خوار میلس ابوو وو منه جَمعی نشسته بی که اویده بیدن عشقسه زس بستونن وو ز همه طرف داره ظلم ابوو بس .. نه زطرف حونواده خوس حمایت ابی ، نه الصن کسی به علاقس به ماپری اهمیت ایدا .. وو هرکی بفکر یوو بی که کُله خوسه بگره باد نبره .. نه بووس اوی که نهله دُهدره بورن .. نه خوس ایترست کاری کنه که نهله ایکار سر بگره .. نه ماپری ایترست ، وو نه جرعت مخالفت داشت .. ایگوی خدا هم دلس ایخواست جِز بونه منه دل ای دونفر که داشتن ای سُهدن وو ای برشتِن ..