{ خدابیل بمدرسه میرود } قسمت دهم _ 10

هنی جا گما دام سر کولوم و پندو لووم که به پشت دست کوفت منه دهونوم خوو نوابیده بی که بووم گوسندانه اوورد بمال ..
بردسون منه قاش جاگیرسون کرد و دست و رینه شوشت دامم یه چوئی نون نها پیشس تا عاجزی بزنه ..
مو هم ز ترس رهدوم پشت تاپوو قام اویدوم .
ادونستوم کتکی که دام زیدوم سر کوچیرس بی ، سر گپس این طی بووم ..
داشتن راجب یوکه چنتا ز میشون تا یه چند روز دیه ازاهن تعریف ایکردن که بووم پرسومه کرد و گوو : بینوم خدابیله نی ؟
دام گوو : خدا بیل نگوو بلا خدا بگوو ..
بووم گوو : ای جغله نا فرنگ باز چه دستگلی به اوو دا ؟
دام گوو ؟ ار بت بگوم اول به کمر بند لاشس اکنی بعدم انجه انجس اکنی !!!
بووم گوو : سیم بگوو بینوم چه کرد ؟ دامم حال حکایت سیس گوو ..
بووم نها وا خنده و گوو : روز اول بت نگودوم نفشنیمس سر کلاس ..
یادته ایخواستی عقته بدری و نفت بریزی کد خوووووت ؟؟
دام به غیض گوو : ایخواستوم جور ایما کور دسکش نبو .. ایخواستوم یه دو کلاس درس یاد کنه سی روز سیاس .. ایخواستوم جور ایما چپون و گاپون ندرا ..
الانم نخندی منه ریس بشوین بس ، چی بس بگوو بلام ز تو ترس داشته بو ..
خومم چنون زیدومس که پای پک و پوزس حینالی آبی ..
بعدسم چنوو گریوستوم سیس که تیام این کور ابون ..
بوم گوو : چطور دلت اوی دس بلند کنی ری کروم ؟ مر به کافر رسیدی ؟
فوقس دوس نداره درس بخونه ز سوو فشنومس پا گله ..
دیدوم دام زی منه ری گو : وی ، وی ، وی ، ار یه بار دی اسم چپونینه اوردی چنو بلیکنوم که هف بنه آبادی اورتر بکهنه همیچو ..
مو اگومت ایطور ، تو اگوی اوطور ؟
بوم نها وا خنده بس گو : زینه نلیکنی تا زه آبرومونه بری !! می چه گدومت که زنی منه ری خوت ؟؟
خدا بیل ار نتره درس خونه میزو صندلی و کتاوانه معطل خوس نکنه بدنس به یکی که لیاقتسه داشته بوو ..
راستس یونه که گوو غیرتوم بجوش اوی ، چنو گریوستوم تا هموچو پشت تاپوو خووم برد ...