{ گلیجون و گوشی عَپل }

اوسوکه پا گله بیدوم صحو زی گلنه اکندوم که خاک و خل گوسندون نره منه گلی مردوم و الا نرفینمون کنن و مُردیلمونه دوُ بدن .

تا ایخواستوم ز در حونه کا قلملی کهخدا مال بگدرتوم ادیدوم دودرس گلیجون دم در واستاده و ایخنده بووم . و یو کار هر روزس وابی .
مونه بگوی انگاریکه دنیا ز خوم بی ، دی ز صوه هی اینشتوم بینوم ایا واسته دم در یانه .
اما دیدوم چن روز دی خوری زگلی جون نبی .
گمونم داس فهمی بی ، چی بس گو .
چند روزی هی پیت ایوردوم و خوری زس نبی تا دیدوم یه روز ددو کوچیرس صحاو جون ( ایما بس اگویم تی تی ) یه قاقض چولنیده دا بدستوم و جست طرف حونسون .
دی زهمو روز به بعد کار تی تی وابی همیو یکی ابرد یکی ایورد ، یکی ابرد یکی ایورد .
 تا یه رو دام بوم گو دا رودوم بینوم تی تی پلسه بریده سی داس زیاد رفتو شد اکنه .
چسه نکنه یکی ز دودرگل کا قلملی قاوته برده .
دا یونون حرومی خردین . آموخته بخردن مال مفتن .
نکنه ریمه سیا کنی 4 تا گوسندنم زدستمون بکنی بدر .
گدومس : دا می لیوه اویدی مو چه به ایکارا . مو دونم نومزاد بازی چنه ؟
مو چا ایکارا داروم جلده با یه تی نون بده بخوروم گسنومه .
دام دی هیچی بوم نگو . اما ز حالس فهمستوم که خیلی برهمابی و الصن بری خوس نیاره .
راستس یه شِز چی بخوم گدوم یه مُست خومه تف و لعنت کردوم . و منه نامه بعدی حال حکایت به گلیجون گدوم .
اما فاده نداشت که نداشت . گلی جون اهل بیخیالی نبی و کمر بست بی هر طورکه وابیده . ای 4 تاگوسنده ز چنگمون بکنه سهرا .
ودیدوم یواش یواش هی طلو پیل زوم اکنه یه روز اگو دندوم درد اکنه پیل بوم بده .
یه رو اگو کوش { کفش } نداروم ،
 یه رو اگو اخوم دماقومه عمل بکنوم .
و هر دفه یه چی گپ تر زوم اخواست . ومونه ساده و خاک منه سر حرف دامه گوش نگرهدوم .
تا امشو که دییدوم اگو دودر آغام جوات یه گوشی عپل خریده عسک یه سیو گلاوی کدسه و یه قل سیو هم گم زیدیه .
گدومس ها !!! سیو گلاوی ؟ گم زیده ؟ !!!!
ودی حال خومه نداشتوم که چه جواوس بدوم .
جهندوم ز گوشی . جهندوم ز سیو گم زیده ؟
 اگوا وا سیم فیض بوک راست کنی . اخوم وا دودر آغام جوات کاننت بنیم سی هم .
اما با ای اوزا و اهوالی که فیض بوک داره نگمونم دی صحاوس آبوم ..