{ خدابیل بمدرسه میرود } قسمت سی یک _ 31

منه همی فرگا بیدوم که دیدوم دام اوی ، گو : دا رودوم اویدی ؟؟ گدوم ، ها دا .. کوینین نیدتون ؟؟گوو : ها دا رهدیم حونه کچیت ، دُو وتی ( دعوتی ) دارن، رهدوم هیاریسون . میلس گرهدن سی ماپری وو فرجلا کُر هالوس .. گدوم دا میر ماپری ناف بُر قوریت کُر آغاس نی .. گو : دا ولا بگوم چه ؟؟ ای بچه هم سر کرد ، اما گپون که وا گپی بکنن ، جور بچیل وا یک رِِشک ابرن وو بچیل ز خوسون بَری کنن ، دا تو نیووی .. واست منه حونه ویرت وا حونه بوو .. گدوم دا دردت زی ریشه گلیم بل بروم بینوم اگون چه ؟؟ گوو : دا رودوم جره ، قاله ، نری بختره .. اما حلا که دوس داری بروُو .. اما هرچه اوی جلدی بیوو سیم بگوو .. گومس باشَد .. اوسوو که رسیدوم جخت یک گرهدن ووز آبادی خمون هرچه پیا بی جم آبیدن وو زمال دوونی هم خیلی پیا ویده بی .. ملا زمون که ز همه گفتر بی میلسه گرهده بی بدست .. گوو : حضرات ایما همه گوئیم .. یو هفتاد ساله که عُرم با عزت ز خدا گرهدوم منه ای آبادی زندئی کنوم .. منه ای سالا خوو بد دنیانه زیاد کشیدیم .. سرد وو گرم دنیا ، اِزموئیدمون .. تنگی دیدم ، قحطی کشیدیم .. آفت زیدمون .. با قلیلی و کثرت دنیا ساختیم .. اما گوو گریمون ز دست ندادیم .. ز گپوون چیائی اشنوفتیم که دونسته بویم به گه تنگ ، وا چه بکنیم .. جنگ دیدیم ، قشون کشیدیم .. ز غریوو خودی خفت خردیم .. با دولت جنگ کردیم .. نفاق بِستن بینمون .. اما بری گوو خمو تفنگ نکشیدیم .. همیشه گوو گریمون سرجا خوس بی .. ز ایوومی سیتون بگوم که ایر بیشتر پشت یکه بداشتیم الان یوو حالوو روزمون نبی .. حضرات اَنگلیسی پای شال وو کُله کِردن وو ویدن منه منطقه بختیاری .. بجُست نفت ایگشتن .. مکینه هانه با خوسون اوردن که باس زمینه سیلا کنن ، تا نفت منه زمینه واس بکشن سحرا .. اوسوو که نفته جستن .. فهمیدن ایر بختیاری رضایت نداشته بوو دولت هم نتره کاری سیسون بکنه ، مَیَر یوو که سهمی زنفت به بختیاری برسه ..، تا بِ ترن به کارسون ادامه بدِن .. وا خوانین شور کشیدن .. نمایندسونه فشنادن خذمت خوانین وو بایک بشور نشستن .. حضرات ایما که دیدن عاقوت خوی در انتظار بختیاریه سفت واستادن پاس وو گودن وا سی درصد ز سهم نفت به بختیاری برسه تا بهلیمتون کار بکنین ..چنیدن جلسه گرهدن ، ز تهرون ادوم فشنادن ،رهدنو اویدن ، رهدنو اویدن ، چونه زیدن ، تا اوردنس سر بیست درصد .. خسونم راضی بیدن به سهم جدید ، اما شروط نهادن که وا امنیت مکینهانه تقبل بکنن .. وو ایر کسی خراووکاری کرد
وا تولسه بختیاری بده .. اما باز به سهم جدید راضی نبیدن .. چینا که دیدن خوانین ز کار معامله معاشره اطلاع نداشتن ، چندین ماه بشور نشستن که ز درصدس کم بکنن .. عاقوت هرچه ترستن ز سهم بختیاری کم کردن تا رسوندنس ری ده درصد .. که ایر نصم همی سهم هم بدستمون برسی الان یوو حالوو روزمون نبی .. در قووال ای سهم واسکه ره بکشن سیمون که دی مال برهون ای همه مرارت بجون نکشه منه ای همه کُهه کمر ، سی رفتو شد به ایلاق ، گرمسیر .. ز ای همه سهم واسکه بیمارستون راست کنن سیمون که زنگلمون سر زا نرن وو هرکینه مار یا گادیم گشت ، ز بی کسی نمیره .. ز ای سهم واسکه کلاس سیمون راست کنن که آ { دست کشی طرف مو } ای بچه یه ساعت و نیم به ره پا پیاده نره تا کلاس منه ای برف وو ره پر ز شل وو شوو ..
عاقوت روز آخری که خواستن سهم بختیارینه قواله کنن ، میلس گرهدن ، نماینده اَنگلیسیا که آدوم کار کشته ای بی ..ز ساده ای وو کله پرته گودن خوانین استفاده کرد وو البته ز خیانت هم بی بهره نمندیم .. بردنس ری سه درصد .. شرطم نهادن که منه زمین هرکه نفت جستن فقط پیل زمین بس بدن دی هیچ حقی نداشته بوو .. زمینامونه پای مفت زچنگمون کردن به دَر .. جغلیل که پا گوسندون بیدن .. پای گوسندونه ول کردن رهدن کارگر مکینه وابیدن .. دلسون به یوو خوش بی که یه حقوقه نصم توله دنسون ..
ادامه در قسمت بعد