{ خدابیل بمدرسه میرود } قسمت هِبدهوم _ 17

ز مهندس خدا فظی گرهدیم وو وَستیم ب ره طرف آبادی خمون ..
افتوو هم در اویده بی ز پشت کُهه وو تیغشتس مِنه ریمون بی ..
به بچیل گدوم : ایما خو امروز بکلاس نرهدیم .. ایر هملا ورگردیم به مال دام هی فرمون بُم اده ..
هی اگوو خدابیل روو نَم چنه بیار ، روو نَم چنه بنه سرجاس .. بیوین ز بال رُوو ورگردیم بینیم بریل آقای مهندس نیجوریم ؟؟
مهرجون گوو : ای خدابیل دردت زی منه تشنیم ایر دام فهمی پلامه تاشه ..
شیخل زخدا خواسته فیچست منه حرفس گوو : ای بنازومت ، خیف گودی بریم ب جوستسون بگردیم بلا یه کوواو سیری خردیم ..
مهرجون گوو : ای حُول منه سر هر دوتاتون ، اشکموایه چی نخرده همس بفِرگ اشکمتونین ..
خلاصه که هر طور بی مهرجون راضی کردیم که وا یک بریم کش بال روو بجوست بَریَل وو صندوقی بگردیم ، اما زمون قول گره که به داس نگویم .. وو تا اول صحووه یکی نجوستسون .. بریم ز دینسون بگردیم بلام زیتر جُستیمسون ..
رَه وَستیم کش رَه بال اوو .. یه خیلی رهدیم اما خوری زسون نبی ..
بعد نیم ساحت تیم رِکِست ، دیدوم جا سُم یه میش بال اوو بی معلوم کرد که یکی ز میشون بی .. چینا که اَوو زس چیر کرده بی بال اوو گدوم خاوو یو یکیسون بگردیم بجوریمس ..
گشتیم تا صداس لرشتسه اَشنیدیم که هی لِرنی .. دیدیمس پَنه یه بَرد منه افتوو واستاده ، داشت دَک ازی ز سرما و هی لِرنی ..
یه میش چال غَشی بی که معلوم بی خوو جوو بس داده بیدن .. وندیمس وا نیامون .. رهدیم جلوتر دیدیم صندوقی هم گیرکرده بی یه مُست اَرو آشغال وو کُنده درخت ..
گدوم خاوو یوهم سی صندوق .. اما چنو خرده بی به بَردو گلال رُوو که پای دربو داغون اوی بی .. با هم کشیدیم اَوردیمس بال اوو ،
تُروکِستیم بلم تر تا ابینیم یه جغله باقیسونه دید ، ز اَوو کشیدیسون به دَر ..
البت قیافس آشنا بی ادونستوم بووس چوداره .. اما داشت پوست یکیسونه اکند ..
رسیدیم بس روندیم به کُوچوک ، وو یه کم دارو دشمونس کردیم ، که فلون فلون اویده سیچه سر برمونه بریدی ؟؟
گوو : پ چطونه روندین ب کوچوک سیم ؟
مو هیچ کار لیشی نکردوم ، میش داشت حَروم ابی سَرسه بریدوم .. بیا یو هم دوتا دیسون؛
یو ز بَد کاریمه خومه دادوم به کُشتن سی میشون ایسا ،
زیدوم به اوو دِر آوردمسون ،
بیا بینین پای رختام خیسن ، یو عوض دستت درد نکنه یه ؟؟
ای رونوم بشکیه که نزنوم به اَوو سی دل میشون ایسا ، بگوو بدبختی گرهدت ..
بِهشتی اوو بوردسون .. بجا یوکه زوم مَدمُون بُوئین ، مُردیلومه دَوو اِدین ؟؟
نیشتیم به یک .. یواش گلال ز دستمون وَست ..
جغله بد طوری برهمآبی ..
اما تش تنگی هم راست کرده بی سی خُسو بریل ..
مهرجون بس گوو : مو نیشنومت اما ای جغله که بووس چوداره یَشنت ..
ادنه کُر کینی .. دست کشی طرف مو ..
جغله گوو ار مونه یشنی بگوو بینوم مو کینوم ؟؟
گدومس : بهزاد ، بهزاد کر قوات ، قوات کر اَلاکروم ، اَلاکروم کر کا اَستلا ..
با تعجب نیشت بوم گوو خدا حونته آباد کُنه تو خِ هَف پشتومم ایشنی ..
تو کر کینی که مو تونه نیشنوم ؟؟
گدومس چام داری ؟ پا گله دیدومت بووم سیم گوو تو کینی ، بُوو ، باوات کی نن..
گوباشه تازه معلوم اکنه .. بیون پا تش تا مو پوست میشه دراروم خوتونه گرم کنین..
ای زام بستنه هم بیارین بال تش داره دک ازنه ز سرما ..
تا ایسا خوتونه گرم کنین یه رونسه کواو کنوم سیتون ..
ادامه در قسمت بعد ..